Մ. ՊՈԶՈԳԼՅԱՆ

ՍՈՒՐԲ ԳՐՔԻ ԲԱՌԱՅԻՆ ՆԵՐՇՆՉՈՒՄԸ  ԳԻՏԱԿԱՆՈՐԵՆ ԱՊԱՑՈՒՑՎԱԾ

Այս գիրքը գրված է՝ ցույց տալու համար, որ Սբ. Գիրքն Աստծո Խոսքն է՝ բառ առ բառ Աստծուց ելած:

Շատերն են հավատում նրա՝ Աստծո Խոսքը լինելուն, սակայն ի՞նչ առումով:

Այս գիրքը գալիս է՝ ցույց տալու, որ ամբողջ Սբ. Գիրքն այնքանով է Աստծո Խոսքը, որքանով այլակերպության լեռան վրա երկնքից հնչած հետևյալ խոսքերը. «Սա է Իմ սիրելի Որդին, որին Ես հավանել եմ. Նրան լսեք» (Մատթ. 17.5):

Սա հաստատելու համար արտակարգ մի փաստ, անառարկելի, անհերքելի և շատ զորավոր մի ապացույց է ներկայացնում այս գիրքը, որի պարունակությունը մեծ մասամբ ամփոփումն ու թարգմանությունն է անգլերեն «New Discoveries» («Նոր զարմանալի հայտնագործություններ»)* վերնագրով գրքի, որը տակավին անծանոթ է շատերին:

Այստեղ ներկայացված փաստերն իմանալը և Սբ. Գիրքն այսպես ընդունելը մեր մեջ ավելի մեծ և անկեղծ սեր, խորին հարգանք, լրջմիտ երկյուղածություն և կատարյալ հնազանդություն կառաջացնեն, որոնք կհեղաշրջեն մեր կյանքը: